Romans 8

Yehoba Yaluyaluwana yawasida lamuna

1Coinega 'eguma Yesu Keliso mahetedai, nata geya 'eta taiya 'ina gwae mwauna 'oida 'ilagulagu.

2Yesu Keliso mahetedai, 'oinega Yehoba Yaluyaluwanaina 'ilihasigita pui ma 'amasa 'idi loina 'oidiyega, ma yawasida 'ehauna talobeya. 3Ta lihasaina Mosese 'ina loina geya sowasowahina, weyahina tauda tomota mumugada we'awe'ana, ma hesi Yehoba lihasaina 'ipaihoweya, beno Natuna moisa 'itagwaleya, 'idobima bale'uwa tauda togala wahida 'isoheya, ta 'ida pui weyahina 'ipwaoliyeya 'iboi, ta 'ida puiyedi 'ihewaiwai sinediya. 4Ma bewa tutaina sowasowahida loina bwebwe'ana tamuliye, beno Yehoba Yaluyaluwana 'ina 'abihetenega, ma geya tomota mumugadiyega.

5Weyahina 'eguma taiyewedi mumuga bale'u simulimuliye, beno siboi weyahidi sinuwanuwatuhu, nata mumugainaina 'oinega 'amasa siloba, eeta taiyewedi Yehoba Yaluyaluwana sihematamatane, taudi Yehoba 'ina nuwatuhuina sipaipaihowa, ma 'ane yawasi bwebwe'ana ta miya daumwala siloba.

7Ta 'eguma bale'u mumugana tahematamatane beno Yehoba talolo'aleha, eema geya wete sowasowahida ma Yehoba 'ina loina tamuliye, 8ma geya sowasowahina Yehoba ta'abihe yaliyaya.

9Ma 'omi Yehoba Yaluyaluwana 'iloiloinegomi, ta 'oimiya wete 'imiyamiya, eeta waboi 'imi nuwatuhu geya 'ida loinegomiya. Weyahina 'eguma taiya Keliso Yaluyaluwana geya 'oina, tauna geya Keliso 'ina boda.

10Ta moisa wahidaedi 'ama'amasidi mumuga galana 'ina loinega, ma 'eguma Keliso 'oida beno yaluyaluwada geya sowana si'amasa, ma hesi mayawasidi simiya bwebwe'ana, weyahina 'i'abi hedumwalu pwaigita.

11Ma Yehoba Yaluyaluwanega Yesu 'amasega 'i'abi hetoholo hileya, ma 'eguma 'oimiya 'imiyamiya, nata 'omi Yehoba Yaluyaluwanaina 'oinega yawasi 'ehauna 'i'ebwaya wahimi 'ama'amasidi 'oidiya.

12Coinega 'iyagwao, geya 'ilobwainegita ma mumuga tomotai tamuliye, nata gide ta'amasa. Ma hesiyage 'eguma mumuga bale'uwa talogwahate ma Yehoba Yaluyaluwana tamuliye, beno nata Yaluyaluwanaina 'oinega wahida mumugana talohe'amasi, ma yawasida bwebwe'ana taloba. 14Ma 'eguma Yehoba Yaluyaluwana tamuliye, beno nata 'i'ahwa natunegita. 15Eeta Yehoba sahena tamatamataute weyahina 'i'ahwa natunegita, ta tauda geya gide 'ina topaihowao, ma hesi gide natunao ma ma'ida 'atepatu tagwaegwae 'oina, “Tamagu!” 16Ma weteyage Yaluyaluwanaina 'oinega sanapu 'i'ebwaya yaluyaluwada 'oida, ma 'abehega tasanapu tauda Yehoba natunao.

17Eema helauwedi 'i'atububuya natunaina Yesu Keliso weyahina, nata Yesu mahetedai helauwedi talobadi Yehoba 'oinega. Weyahina 'eguma Keliso mahetedai muya ta'ahali, nata wete mahetedai wasawasa taloba. 18Ma muyaedi bewa tuta talobalobadi yasanapuya geya ginaula madouna, weyahina 'abwa muliyetega miya bwebwe'ana hedada taloba, 19weyahina ginaula mabwaiyana Yehoba 'ipaihowediya siyamwayamwana, ma nuwanuwadi madouna 'abehega tauda natunaowedi 'i'abihe latuhegita ma si'itegita.

20Ma Yehoba 'ina paihowao geya galadi, ma hesiyage 'igwaeya ta bewa tuta siheginaula besobesowa, ma hesi ma'idi hemisa wete, 21weyahina 'abwa weteyage Yehoba 'i'abi'ehau hiladi, ma geya sowasowahina simwahulu, ma hesiyage 'idi miya bwebwe'ana 'i'ebwaedi, gide tauda natunaowedi.

22Ta moisa, Yehoba 'ina paihowaedi siwelawelaha tuta mabwaiyana muya 'oidiyega, gide wahine 'ana muya henatuna 'oina. 23Ma tauda Yehoba Yaluyaluwana lotohona bwebwe'ana 'i'iuna 'i'ebwaegita ee 'abwa muliyetega miya bwebwe'anaina taloba moisa. Coinega bewa tuta ma'ada muya tawelawelaha, ma tayamwayamwa tolahisa 'abwa wahida 'i'abi'ehau hila, ma 'i'ahwa natunegita moisa.

24Ma 'abihetenaina hemisega talobaloba, weyahina bewa tuta wahida 'idi 'ehau geya tada lobeya, eeta ma'ida hemisa tayamwayamwa 'ana siga 'ida hemisaina huwaina taloba, ma 'ane 'ida hemisaina 'ilolagu. 25Ma 'eguma 'ida hemisaina 'e'enina geya tada lobeya, tuwa 'alama'i'itanega tayamwayamwana ee 'ana siga taloba.

26Ta Yehoba Yaluyaluwana 'ida we'a 'oidiyega, tauna 'i'abi 'abihetegita, weyahina 'ida 'ahwanoi 'oidiya geya tasanapu togidega ta'ahwanoi 'esa, ma Yehoba Yaluyaluwana hesiyage weyahida 'ihetahetapewa ta ma'enana ma'ina welaha 'i'ahwa'ahwanoi waiwai Yehoba 'oina.

27Yehoba tauna 'ida nuwatuhu 'isanapudiya, ma weteyage 'iboi Yaluyaluwana 'ina nuwatuhu 'isanasanapudi, weyahina Yaluyaluwanaina Yehoba 'ina tomotai weyahida 'i'ahwa'ahwanoi, weyahina Yehoba Yaluyaluwanaina mahetena 'idi nuwatuhu 'aigeda.

28Eeta tasanapuya 'eguma Yehoba tahelauwe nata ginaula mabwaiyadi 'i'abihe dumwaludi weyahida, beno tauna 'ina nuwatuhu gide ta 'ibwauwegita. 29Eeta taiyawedi tauda 'ibwauwe pwaigita, beno 'igwae hemisegita ta tauda natunao, gide tuwa natunaina, eeta tauna 'ada tautuwa ma tauda 'ana 'alomauwao. 30Ta Yehobaina 'ihesinuwegita, ta 'ibwauwegita, ta 'i'ahwa bwebwe'anegita, ma weteyage 'ida 'ebemiya wasawasa 'i'ebwaegita.

Yehoba 'ina helau

31Ma moisa Yehoba 'ina helau 'imadou hedadeya. Ta 'eguma Yehoba mahetedai, nata 'i'abihetegita, eeta geya sowana 'eta taiya 'ilolo'alehegita. 32Weyahina Yehoba natuna moisa geya 'ida nuwahiya, ma hesiyage 'itagwaleya weyahida, 'abwa ginaula mabwaiyadi wete 'i'ebwaegita.

33Coinega nata geya wete taiya 'ihehe'ewegita, weyahina tauda Yehoba 'ihesinuwegita ta 'i'ahwa dumwaluwegita. 34Geya wete nata 'eta taiya 'ina gwae pa'alina 'oida 'ilagulagu, weyahina Yesu Keliso tauna weyahida 'i'amasa pwaiya ta wete 'itoholohila, 'oinega bewa tuta Yehoba 'ina 'ebeulega 'imiyamiya ma weyahida 'i'ahwa'ahwanoi.

35Coinega geya 'eta ginaula sowasowahina ma Keliso 'ina helauina 'oidega 'i'ewa yahule, mwauwedi gidemusa muya bo woya bo gomale bo hewewelohe bo hesilae ma wete 'amasa. 36Mwauwedi weyahina Yehoba 'ina Bukiya 'aigeda gwae gide 'igwaeya,

“Sauga mabwaiyana 'ebe 'amasa 'oina 'amiyamiya, gide guyai bawedi sabi lohe'amasimai, beno 'ino paihowa weyahina.”
37Ma hesi ginaula mabwaiyadi bewa 'oidiyega tahewaiwaiya, weyahina Yesu 'ina helau ma 'ina 'abihetena 'oida 'imadou hedada.

38Moisa yasanapu bwaibwainiya 'abehega geya 'eta ginaula wete sowasowahina ma Yehoba 'ina helau 'i'ewayahule 'oidega, nuwana mayawasida, nuwana ta'amasa, nuwana 'eta anelose bo 'eta Tomudulele 'ina boda 'idi paihowega, bewa tutaina nuwana tuta 'inaonaoma 'oina, bo toloinao galewa nuwana bale'uwa 'idi waiwaiyega. Weyahina Yehoba 'ina helauina, 'ida Bada Yesu Keliso 'oinega, geya 'eta taiya sowasowahina ma 'i'ewayahule 'oidega.